هو انا ينفعلى ليزك يا دكتور؟
السؤال ده ميتجاوبش عليه غير بعد ٣ حاجات.
أولا لازم يتعملك مقياس نظر بالنظارة وبدون عشان نتأكد ان الليزك مُجدى اصلا وان فيه فرق فى النظر بالنظارة
مايمكن عندك كسل ساعتها مش هتتحسن.
ثانيا لازم يتعملك فحص اسمه pentacam بيقيس سمك وتضاريس القرنيه بتاعتك مايمكن ياسيدى نظرك كويس بس قرنيتك ربنا خالقها رفيعه بزياده ومتسمحش او يمكن سمكها هيحتاج كاستم ليزم مش ليزك عادى.
ثالثا يتعملك فحص للشبكيه وده بيكون بقطرة توسيع
مايمكن نظرك كويس واشعتك كويسه ولاقدر الله المشكله ورا فى الشبكيه اللى بتنقل الصوره للمخ
منا ممكن اعملك ليزك ونوصل صورة زى الفل للشبكيه بس هى نفسها فيها خلل ومش هتنقلها للمخ واضحه يبقى ايه لزوم الليزك بقى.
وبعدين مينفعش تعمل ليزك وعندك ماية بيضه.. ليه؟
لأن اللى عنده مايه بيضه بنشيل عدسة عينه اللى فيها المقاس ونزرعله واحده جديده بمقاسات جديده مظبوطه جوه عينه كأننا زرعنا النظارة فليه يتكلف مرتين مرة ليزك ومره مايه بيضه وبعدين ليه يتلعب فى قرنيته مرتين؟!!
مش صح تعمل ليزك وانت عندك مقاس نظارة كبير ومش بتلبسه عينك مش هتبقى واخده عالليزك اللى هو كأنه مقاس نظارة هتضايق وممكن يجيلك سنة حول لو عندك قصر نظر وملبستش نظارة قبل كده بس دى مش منتشرة اوى
طب اعمل ايه؟
البس النظارة كام شهر ولما تاخد عليها تعالى اعمل ليزك
ولو حصل ان عينك حدفت شوية طول بالك وافضل البس النظارة ممكن تحصل ان الحدفه اللى فى عينك تتحسن لوحدها وممكن تحتاج عملية حول بعد الليزك بس دى برضو مش منتشرة اوى.
الخلاصه مفيش حاجه اسمها ينفعلى ولا لأ بالكلام كده او بمقاش النظارة… نكشف وبعدين نتكلم.
Comments
0 comments
