اى انسان منا عندما يولد اول ما يبحث عنه هو الاهتمام والتقبل من الاخرين والاخرين بالنسبة للطفل هم الوالدين وعندما يفتقد هذاالاهتمام من الوالدين يبدا البحث عنها فى مكان اخر مع اشخاص اخرين
أمبارح كنت مع أبني بيلعب في حمام السباحة وأنا قاعده بره بتابعة
ولان أبني صغير فمحتاجة أكون مركزه معاة طول الوقت وهو بيعوم
كل شوية ينده عليا مامي بصي الحركه القوية دى
شوفتي بتشقلب ازاى
مره أسقف له ومره أقولو برافو عليك
في نفس الوقت ولد من سن أبني شافو مبسوط بالتفاعل اللى بينا
فراح لمامتو وبدأ يعمل حركات وينادى عليها تتفرج علية وهي مش بتستجيب
فضل يعمل حركات مختلفه علي أمل أنها تعبره
كان رد فعلها كالأتي
أنت اساسا مش بتعرف تعوم بطل الي أنت بتعمله ده وعوم عدل
ما خلاص بقي بصيت مره ألعب وأنت ساكت
الولد طبعا لقي أنه مفيش فايده من الأم فعمل تصرف غريب جدا
وقف جنب أبني وحاول يزقه في المياة و شد منه نضارته
هل دى غيره ولا غضب ولا محاولة لجذب الانتباة ؟؟؟
لما لقيت الولد بيزيد في التصرفات دى قمت و قولتو أى رأيك يا حبيبي تلعبوا مع بعض
المهم بدأو يلعبوا والولد كل شوية يبص لي ويعمل حركات ويقولي طنط طنط
ومرة غلط وقالي مامي بصي عليا وسقفيلي وقوليلي شاطر يا حمزة زى ما بتقولي لده (أبني)
فضلت طول الوقت بحاول أوزع أهتمامي و تشجيعي بينهم و لما جاتلي مكامله ورديت نده عليا وقالي سيبي الموبيل دة وبصي علينا
الحقيقة الموقف دة أستوقفني و حسسني أد أيه أننا بنفضل نطلب الأهتمام والحب والتشجيع من أهلنا و المقربين لينا كتيرجدا
ولما بنترفض كتير بنبدأ نعاني ونتعذب وممكن نعمل تصرفات غير منطقية
وبعدها بنقرر ندورعلي الأهتمام برة , الخوف هنا أننا في شده الاحتياج ممكن نضعف ونروح لأقرب أيد بتتمدلنا والله أعلم بقي بمصيرنا ممكن يكون أيه
الفكرة دى بتظهر فى مواقف كتير زى
-البنت الي تحب وترتبط عاطفيا بمدرس أكبر منها بسنين لأنه عطف عليها و أهتم بيها في مرحله في حياتها كانت محتاجة للاهتمام دة
-الأهل اللي بيصدوا أبنهم لما بيشارك برأيه ويقولو لة أنت لسه عيل معندكش خبرة
وبنرجع نستغرب أن ولادنا مش قابلين مننا كلمة ولا نصيحة و مفضلين أصحابهم علينا
-بنات كتير بتقبل بأى عريس يتقدم لأنها عايزة تهرب من بيت كلة جفاء ومشاحنات بحثا عن الحب والاهتمام والكلمه الحلوة
ومواقف كتير جدا غيرها بنقابلها ونشوفها في ناس حواليا
Comments
0 comments
